Landsstýriskvinnan í mentamálum, Rigmor Dam, hevur sett Hans Jón Juul Thomsen í starvið sum skúlastjóri í Hoyvíkar skúla.
Hans Jón er 42 ára gamal. Hann tók læraraprógv í 1998 og hevur tikið eftirútbúgvingarskeið innan leiðslu og í persónligari leiðslumenning, AKT skeið og hevur útbúgving sum konsultativur ráðgevi. Fyrstu fimm árini starvaðist hann í Danmark, har hann var lærari á bústovni fyri børn og ung við sosialum- og trivnaðarligum avbjóðingum og var AKT ráðgevi í Pædagogisk Psykologisk Rådgivning í Aalborg Kommunu.
Hans Jón hevur síðan hann kom aftur til Føroya starvast sum lærari á familjudeildini á Føroya Barnaheimi, í Hoyvíkar skúla og verið leiðari í NSR tænastuni í Eysturoynni. Í seks ár hevur Hans Jón starvast sum varaskúlastjóri í Skúlanum við Løgmannabreyt. Seinasta hálva árið hevur hann arbeitt sum ritstjóri í Námi, har hansara arbeiðsøki m.a. hevur verið talgildar royndir og próvtøkur í fólkaskúlanum.
Hans Jón tekur við starvinum sum skúlastjóri í Hoyvíkar Skúla frá 17. mars 2016 at rokna.
Mentamálaráðið, 3. mars 2016
