Rigmor Dam landsstýriskvinna hevur sett Regin Marnersson í starvið sum skúlastjóra í Skúlanum á Fløtum, landsstýriskvinnan hevur sett Marina Sigvaldsdóttir Bláberg í starvið sum fyrstalærara í Hvalvíkar skúla og landsstýriskvinnan hevur eisini sett Fríðgerð í Líð sum fyrstalærara í Hósvíkar skúla.
Skúlastjóri í Skúlanum á Fløtum
Rigmor Dam landsstýriskvinna hevur sett Regin Marnersson í starvið sum skúlastjóra í Skúlanum á Fløtum. Regin er 37 ára gamal og tók læraraprógv á Føroya Læraraskúla í 2005.
Regin hevur tikið akademi merkonomútbúgving í leiðslu, skeið í persónligari leiðslumenning, stakgrein í verkætlanarleiðslu og er tikin inn á námsfrøðiligu leiðsluútbúgvingina á Setrinum.
Regin hevur starvast í skúlaverkinum í mong ár, sum lærari í Tórshavnar Kommunuskúla frá 2005 til 2012, sum varaskúlastjóri og seinni sum stjóri í Skúlanum á Giljanesi frá 2012 – 2015 og hevur frá 1. mars 2015 verið stjóri í Námi.
Regin tekur við starvinum sum skúlastjóri í Skúlanum á Fløtum 1. august 2017.
Fyrstilærari í Hvalvíkar skúla
Landsstýriskvinnan í Mentamálum hevur sett Marina Sigvaldsdóttir Bláberg í starvið sum fyrstalærara í Hvalvíkar skúla. Marin er 43 ára gomul og tók læraraprógv í 2003.
Marin hevur drúgvar undirvísingarligar royndir. Hon hevur starvast sum lærari fólkaskúlanum í 14 ár, eitt ár í Miðvágs-Sandavágs skúla, síðani tíggju ár í Sørvágs skúla og seinastu trý árini í Skúlanum á Giljanesi.
Marin hevur harumframt verið virkin í kommunustýrisarbeiði og innan ítrótt. Hon hevur sitið tvey valskeið í Vága kommunu frá 2009 – 2016, har hon hevur havt ymsar nevndarsessir m.a. sum formaður í mentanarnevndini. Marin hevur verið venjari í boccia og badminton og í mong ár virkin í kappróðri, er nevndarlimur í Róðrarsambandi Føroya, har hon er skrivari.
Marin tekur við starvinum sum fyrstilærari í Hvalvíkar skúla 1. august 2017.
Fyrstilærari í Hósvíkar skúla
Landsstýriskvinnan í mentamálum hevur sett Fríðgerð í Líð sum fyrstalærara í Hósvíkar skúla. Fríðgerð er 37 ára gomul og tók læraraprógv í 2012. Fríðgerð hevur síðani starvast sum lærari í Hoyvíkar skúla og á Føroya Fólkaháskúla. Fríðgerð hevur eisini starvast sum lívbjargari í svimjihøllini í Gundadali og hevur verið vikarur í fólkaskúlanum í átta ár.
Fríðgerð er í holt við at taka leiðsluútbúgving í almennari fyrisiting sum sjálvlesandi, og hevur higartil tikið átta skeiðspartar. Fríðgerð er stjóri í egnari fyritøku, har hon umboðar, sniðgevur og selur bundnar vørur við merkinum FíL.
Fríðgerð tekur við starvinum sum fyrstilærari í Hósvíkar skúla 1. august 2017.
