Í 1980-unum var talið av fosturtøkum um 80 árliga. Í 1990-unum minkaði tað niður um 60, um aldarskiftið niður um 50, í nullunum niður móti 40 og hesi síðstu árini niður um 30.

Nú er eisini talið av kvinnum í burðarførum aldri broytt nógv hesi árini, eins og føðitalið. Men eisini tá vit rokna í mun til kvinnutalið og føðitalið, er gongdin tann sama, eins og myndin niðanfyri vísir.

Minkingin er í teim meira tilkomnu aldursbólkunum
Umframt fallið í fosturtøkutíttleikanum er eisini hend ein broyting í aldursbýtinum av teimum kvinnum, sum fáa framt fosturtøku. Fram til 1990-ini var títtleikin rættiliga javnur í aldursbólkum heilt frá 20-24 ár og fram til 40 ár, størstur millum 25 og 39 ár.

Hetta broyttist nógv frá nullunum, sum vit síggja í myndini niðanfyri, at títtleikin øktist í unga aldursbólkinum 20-24 ár, har hann nú er størstur, meðan tað hevur verið stórt fall í títtleikanum í øllum aldursbólkum oman fyri 20-24 ár.

Í Norðurlondum er fosturtøkutíttleikin nógv lægstur í Føroyum
Um vit rokna talið av fosturtøkum í mun til talið av livandi føddum fyri at kunna samanbera við onnur lond, síggja vit, at í Norðurlondum er títtleikin nógv lægstur í Føroyum, t.d. 39 fosturtøkur pr. 1000 livandi fødd í Føroyum, men 264 fosturtøkur í Danmark pr. 1000 livandi fødd, altso um sjey ferðir so nógv.

Fosturtøkutíttleikin lægstur og føðitíttleikin hægstur í Føroyum
Tað kann vera vert at leggja til merkis, at vit hava ikki einans nógv tann lægsta títtleikan av fosturtøkum í Føroyum av øllum Norðurlondum, men harumframt eisini tann størsta títtleikan av livandi føddum, so sum myndin niðanfyri vísir: til samanberingar fær ein kvinna í burðarførum aldri í Føroyum í miðal 2,6 børn, meðan ein kvinna í Danmark fær 1,8 børn og í Noregi 1,7 børn, roknað eftir føðitíttleikanum sum hann var í 2016 hjá øllum kvinnualdursbólkum frá 15 til 49 ár.

Kelda til upplýsingarnar hjá Hagstovuni um fosturtøkur eru Heilsuverk Føroya og Landslæknin.
Dagførd og útgreinað hagtøl eru at finna í hagtalsgrunninum her.