Tað er neyðugt at rætta uppá mest margháttligu avgerðirnar, sum eru í Fámjin og bummgjaldi. Tunnlar elva til ómoral á tingi. Tað má broytast
Íløgur í vegir og tunnlar verða raðfestar og umraðfestar við jøvnum millumbili. Ein trupulleiki er, at hetta verður gjørt sum valagn. Hesar, ofta margháttligu raðfestingar, verða tí ofta rættuliga ómoralskar. Um ikki tá tær verða gjørdar, so seinni. Vit taka nøkur dømir.
Øll, sum høvdu eina meining, vóru samd um, at tá lánini í undirsjóvartunnlunum vóru afturgoldin, so skuldi tað verða ókeypis at koyra. Endamálið við gjaldinum var, at framskunda íløguna og soleiðis fíggja tað, sum manglaði í. Skal ikki geva Poul Michelsen skyldina fyri at tað framvegis kostar. Men eg minnist hann, sum tann fyrsta, sum segði, at gjaldi skuldi halda áfram í minsta lagið til landskassans partur var afturgoldin. Sostatt bleiv avtalan millum fólkið og landskassans brotin.
Undirsjóvartunnlar eru nú ein serskattur, sum bara nøkur útvald í Føroyum skulu gjalda. Hetta er og verður ómoralst. Soleiðis ger eingin rættskaffin maður ella kvinna. Tað eru bara fólk við ongum morali, sum eru líkaglað við onnur og bara hugsa um sjálvan seg, sum gera slíkt.
Tunnil skuldi gerast til Fámjin. Har var klárt at byrja. Men so funnu nakrir javnaðarmenn, uttan moral, uppá, at Dalstunnilin skuldi gerast fyrst. Fólki í Fámjin, sum fult og fast trúði, tí tey fingu lova, eru sjálvandi illa við av slíkari framferð. Tað var ongin orsøk at umraðfesta, uttan atkvøður til ómoralskar javnaðarmenn. Innanhýsis ómoralsk telving í Javnaðarflokkinum, sum tekur lívsneistan frá heilari bygd. Men onkra takk skal javnaðarmaðurin í Norðoyggjum hava afturfyri at avhøvda síni egnu har norðuri. Tað er óheppi at moralur er blivi eitt fremmandaorð og manglandi moralur settur í staðin.
Tað eigur ikki at verða nakað ivamál um, at aftaná komandi val verður tunnil gjørdur til Fámjin beinan veg. Somuleiðis eigur bummgjaldið í Vága- og Norðoyatunnlinum at verða avtakið. Tað er beinleiðis ómoralst, at gera annað.
Játtanin til rakstur á fíggjarlógini er alt ov stór meðan íløgujáttanin er alt ov lítil. At broytt hetta rætta vegin hevði sjálvandi eisini gjørt tað lættari hjá politikarum at verið meira moralskir og minni ómoralskir.
Veljarin hevur ivaleyst moralsku kumpassina við í metingunum, næstu ferð hann setur krossin.
Eivind Jacobsen
Valevni fólkafloksins
